Tuesday, December 31, 2013

ඇය යන්න ගියා...



ඔය මන් ගාවට ආපු දවසේ
මන් සතුටින් හිටපු තරම් ඔයාට
මතකද???
මන් ඔයත් එක්ක ඉන්නකම්
දැනුනේ නෑ
ඔයා මාව දාලා යන දවසකුත් එනවා කියලා..
දුක සතුට කරදර බාදක ජය පැරදුම්..
ගොඩක් ඔයා මට අරගෙන ආවා..
සැලසුමක් ඇතිව ජිවත් වෙන්න
මන් හිතන් හිටියා ඔයත් එක්ක ..
ඔයා ආපු දවස් වලම දැකපු
අපේ සමහර හීන
හැබෑ කරගන්න බැරි වුනා
ඔයා මාව දාලා යන දවස වෙනකම්ම
ඔයා යනකොටම
ඇය එනවා..
ඔයත් එක්ක හැබෑ කරගන්න බැරිවුන
හීන
ඇයත් එක්ක හැබෑ කරගන්නම්
ඇයත් මාව දාලා යන්න කලින්   


හිත මිතුරු ඔබ සැමට නව වසර සුබම සුබ නව වසරක් වේවා!!!!!!

ජනාදර හිතාදර ෂැගියා...




Friday, December 27, 2013

ඇසුණු කතා.. (ඇනකොන්ඩාවට මොකද වුනේ..)

නත්තල් නිසා මේ ටිකේ පොඩි පොඩි සාදයන් හැමතනමය. මමද එකකට දෙකකට සහභාගී වීමි.කෙසේ හෝ එකතැනකදී ඇසුණු කතා බහක් මෙසේ සටහන් කරමි.කතාවනම් ඇනකොන්ඩාව ඇනකොන්ඩිය ගිල දැමීම පිලිබඳවය.
මාතෘකාව ඔස්සේ විවිද කරුණු යන අතර එක්තරා පොරක් මෙසේ කියුවේය..
“ඕකත් බන් ආණ්ඩුවේම වැඩක් තමයි. උබලට ඉතින් ඕව තේරෙන එකක්යැ මේකයි දැන් බලපල්ලා උබලට බඩුමිල වැඩි වුන එක පඩි වැඩි නොවුණු එක බස් ගාස්තු වැඩි වුන එක මේවා සේරටම වඩා ලොකු කොහෙවත් නැති වලත්ත  ඇනකොන්ඩියක් උගේ මිනිහව ගිලපු එකනේ”

ඒත් එක්කම තද වුනු පොරක් තමා අදහස් වේගයෙන් කියාගෙන යන්නට විය.මා ඔහු හදුනන්නේය මහරජාණෝ කිවුවොත් ඔහු දන නැමෙන්නේ නිසඟයෙන්මය.
“අනේ බන් නිකං බොරු කතා නොකිය ඉඳපන් උබලා දන්නේ ඕන දේකට ආණ්ඩුව අල්ල ගන්න තමා ගංවතුරක් සුනාමියක් ආවත් වැරදි ආණ්ඩුවනේ හ්ම්ම්ම් මේවා බන් රජය අපහසුතාවට පත් කරන කුමන්ත්‍රණ දැන් ඔය ඇනකොන්ඩා මැරුණු එකෙන් අපේ රජය අපකීර්තියට පත් කරන්න තමයි විජාතික බල වේග වලට ඕනි. ඒ අස්සේ උබලා ඒකට උල් පන්දම් දෙනවා.. අනේ තොපි වගේ ජාතිද්‍රෝහියෝ ”

දෙදෙනා අතර වාග්ප්‍රහාරය තියුණු වූ නිසා හැන්සාඩ් වාර්තාවෙන් ඉවත් කරන ලදී..

“උබලා ඕකට ගහ මර ගන්න එපා.ඒක බන් ඔය ඇනකොන්ඩගේ කරුමේ.තමගේ එකට හිටපු නෝනා ම ගිලලා මැරෙන්න තරම් වූ මොන සා නම් පවක් කරලා ඇත්තද??” ඒ ධර්මදාස අන්කල්ය.

“අනේ ධර්මේ උබලාගේ ඔය කර්මේ නිසා තමා මේ සේරම මේක මචන් මේ සමාජ කර්මයේ වරද්ද??පුළුවන් එකා හැමදාම බැරි එකාව ගිලන් කනවා.අනික බන් බඩගින්න වැඩි කමට නෝනද මහත්තයද ළමයද කියලා නෑ ගිලලා දානවා. ඒ තරම් මේ ධනවාදී ආර්ථික ක්‍රමය මහා පිළිලයක් වෙලා.මේ ක්‍රමය වෙනස් වෙන්න ඕනි”
ඒ රැවුල වවන් රතු තොප්පියක් පැළද සිටි කෙනෙකි..

“ඇත්තටම බන් ඔය සත්තුන්ට දීලා තියෙන්නේ කුකුලෝ තුන්දෙනයි එක වුන්ට ගෑවෙන්නත් මදි එකයි ප්‍රශ්නේ”
අනික බන් ඕක වෙන්නේ ඇනකොන්ඩ ලා අතර විතරක් නෙමේනේ බන් දැන් ඇනකොන්ඩි එක පාරක් මිනිහව ගිලලා වැමෑරුවා එච්චරයි ඒකටා අපේ අනකොන්ඩියෝ ගිල ගිල වමාරනවා අපිව හැමදාම”

එක එක මතවල සිටි සැවොම ඒ මතයට නම් එක හෙලා එකඟ වුනි.මේ කතා බහ අතර පළමු මදුවිත බෝතලය ඉවර වූ අතර දෙවැන්නට මාරු වන ලදී..

කෙසේ හෝ පාට පාට කන්නාඩි වලින් ලෝකය බලන්නේ නැතුව ස්වාදීනව ඒ දෙස බලන්න පුළුවන් නම් අලුත් අවුරුද්දේ ඉදන් වත් ගොඩක් හොදයි නේද???

Saturday, December 21, 2013

මගේ නත්තල දුගියා බත් කන දාය..

මගේ නත්තල දුගියා බත් කන දාය...
 





පන්සලේ පියතුමා එහෙමත් නැත්තම් මර්සලින් ජයකොඩි පියතුමාගේ කාව්‍යම අදහසක් තමයි ඒ..
පහුගිය දෙසැම්බර් 19 ෂැගියට පුංචි ඇරයුමක් ලැබුනා නත්තල් සාදයකට යමු කියලා.ඒ අපේම campus එකේ සහෝදර කතෝලික සහ ක්‍රිස්තියානි සොයුර සොයුරියන්ගෙන් sun beams සමාජයෙන් , අපිත් දැන් දෙපාරක් විතර නත්තලට කැරොල් කියපු එකේ අපිත් වැඩේට සෙට් වුනා. මොනවා වුනත් සාදයක්නේ ;) සාදය තිබුනේ අනුරාධපුරේ අවන්ති දේවි ළමා නිවාසයේ ඉතින් අපිත් උදේ පාන්දර 9 ට විතර පිටත් වුනා යද්දී අපිත් එක්ක අනුරාධපුරේ (කැකිරාවට ) කිට්ටු සොයුරියක් පාර පෙන්නපු නිසා අපි සෑහෙන වෙලාවකට පස්සේ තැන හොයා ගත්තා.කොහොමහරි ඉතින් එතනට යද්දිත් වැඩේ ටිකක් පටන් අරන් තිබ්බේ.
 
අපි යනකොට පුංචි කෙලි පොඩ්ඩියෝ දෙන්නෙක් සින්දු කියනවා.ඒ පුංචි වුන් ලස්සන ඉදිරිමත් කිරීම් ගොඩක් කළා හැබැයි ෆොටෝ ගන්න තහනම් නිසා අපේ හෙන්ඩු කොලුවා අර තඩි කැමරාව උස්සන් අලි මන්තර කියා කියා බලාගෙන හිටපු හැටි මතක් වෙනකොටත් දුකේ බෑ.සින්දු එකක් දෙකක් නෙමේ 3ක් 4ක් ම කියුවා.
ඒ වෙලාවේ අපේ වුන් ගොඩක් සංවේදී විදිහට බලන් ඉන්නවා මන් දැක්කා.මටත් මහේෂ් කුමාර කවියාගේ දේශනේකදී කියපු කාරණාවක් මතක් වුනා.ඒ තමයි බොහෝවිට කලාවෙන් එලියට එන්නේ අපිට ලබා ගන්න තියන දෙයක් ගැන හරි නැතිවුන දෙයක් ගැන හරි කියලා. ඇත්ත ඒ ළමයින්ට නැති සහ ලබාගන්න තියන එකම දේ අම්මයි තාත්තවයි ඉතින් ඒ පොඩි වුන් කිවුවෙම ඒ ගැන ලිය වුනු ගීත.. ඒක හරිම සංවේදී විදිහට දැනුනු කාරණාවක්.
අපි 12 වෙනකම් සින්දු නටුම් ගැයුම් ක්‍රීඩා සුහද කතා බහ මේ දේවල් එක්ක පුළුවන් තරම් ඔවුන්ව සතුටින් තිබ්බා ඇත්තටම අපේ යාළුවන්ට හිතුනු මේ අදහස ගැන හිතේ ඇති වුනේ පුදුම ගෞරවයක්.පොඩි වුන් හිනා වෙනවා දැක්කම හිතට දැනුනු සතුට නම් කියලා වැඩක් නැහැ..
පොඩි වුන්ට තෑගී දෙන නත්තල් සීයා වගේ ආපු මුවා නොහොත් සජිත් අංකල් තෑගී බෙදනකොට මට මතක් වුනේ බැරි වෙලාවත් නත්තලට ඒ පොඩි එකෙක් සීයා ගෙන් අම්මයි තාතත්යි ඉල්ලුවනම් එහෙම අපි මොකද කරන්නේ කියලා..
කොහේ හරි වරදක් ඇති ඒත් මේ පොඩි වුන්ගේ වරද මොකක්ද??? අනේ මන්දා..
මොනවා වුනත් අම්මා තාත්තා නැතත් ඊටත් එහා ගිය දෙවියන් වහන්සේගේ ආදරය උබලට හැමදාමත් ලැබේවී.මේ වගේ විදියට නත්තල සමරන්න දෙවියන් වහන්සේ හොඳ හිත් ඇත්තන්ව පොලබාවි.
කුමන ආගමක දහමක අය වුනත් හැමෝම සමගියෙන්  ලෝකයේ මනුසත් බව අගයනකොට ජිවත් වෙනවා නම් මේ ලෝකේ මීට වඩා තව ලස්සන වෙවී..
රසාංජලී සොයුරි ඒ කියන්නේ මේ වැඩේට මුල් වුනු සොයුරියක් ඇය කියපු කාරණාවක් තමයි.. “අපිට ඉර වෙන්න බෑ ඒත් අපි ඉරු කිරණ වෙලා අදුර පොඩ්ඩක් හරි නැති කරා කියලා”
හැබැයි මට දැනුනේ නම් ඉර නොපායපු උන්ගේ ලෝකෙට උබලා ඉරක්ම වුනා කියලා..
හැමෝගෙම නම් ලියන්න බැරි වුනා එකට සොරි වේවා!!!